Plantun de Prouvènço

Pèr coumpara dos planto d'encò nostre

Eriobotrya japonica & Asparagus acutifolius

Neflié

Eriobotrya japonica

Rosaceae

Àutri noum : Nespié, Gnaspié, Nesplié, Nespoulié.

Noms en français : Néflier du Japon, Bibacier.

Descripcioun :
Lou neflié dóu Japoun que fau pas counfoundre emé lou "vertadié" nespié, Crataegus germanica, es un aubret, o un pichot aubre planta que pòu resta de tèms en plaço sènso se naturalisa. Èi proun couneigu emé si nespo aranjo goustouso à manja. Flouris en autouno o à la debuto de l'ivèr.

Usanço :
Lou sirop de nesflo es adouba en Chino pèr apasima lou tussi e la brouchito. Au Japoun se n'en servon pèr sougna li mau de pèu (raumido...).

Port : Aubret
Taio : 2 à 6 m
Fueio : alterno
Tipe bioulougico : Faneroufite
Cicle bioulougico : Planto renadivo

Gènre : Eriobotrya
Famiho : Rosaceae

Ordre : Rosales

Coulour de la flour : Blanco
Petalo : 5
Ø (o loungour) enflourejado : 5 à 15 cm
Flourido : Autouno - Ivèr

Sòu : Ca
Autour basso e auto : Pancaro entresigna
Aparado : Noun
Óutobre à janvié

Liò : Pargue
Estànci : Termoumediterran à Mesoumediterran
Couroulougi : Óurigino Asìo-Èst
Ref. sc. : Eriobotrya japonica (Thunb.) Lindl., 1821

Espargo-fèro

Asparagus acutifolius

Asparagaceae

Àutri noum : Aspàrgou, Espargasso, Roumanin-couniéu, Roumiéu-couniéu, Pèd-de-Róumi.

Nom en français : Asperge sauvage.

Descripcioun :
L'espargo-fèro es uno planto bèn couneigudo de nòsti garrigo e éusiero. A la fin de l'ivèr sort de terro, èi lou moumen de l'acampa ! Pièi la tijo devèn duro coume uno co-rudo. Flouris tardié, raramen avans juliet.

Usanço :
Coume l'avèn di, s'acampo à la primo pèr li meleto. La planto èi proun bono pèr la santa, richo en vitamino (A, B, C, PP...) e en sau mineralo (P, Mn...). Fai pissa (óudour de 1,2-ditiole) e es un pau lachativo.